YANGI YIL TABRIGI
Assalomu alaykum hurmatli professor-o‘qituvchilar, xodimlar, talabalar va magistrantlar. Barchangizni kirib kelayotgan yangi 2025-yil bilan chin dildan samimiy muborakbod etaman! 2024-yil yakuniga yetar ekan O‘zbekiston davlat san’at va madaniyat institutining Farg‘ona mintaqaviy filialida erishilgan yutuqlarga nazar solsak. O‘tgan o‘n ikki oy davomida filial nafaqat O‘zbekistondagi yetakchi san’at va madaniyat muassasasi sifatidagi mavqeini mustahkamladi, balki global hamkorlik, innovatsiyalar va madaniy boyitish orqali o‘z imkoniyatlarini kengaytirdi. Filialida 60 nafar professor-o‘qituvchilar, jumladan, 3 nafar professor va 24 nafar dotsentlar faoliyat yuritib kelmoqda va filialning ilmiy salohiyati 47,5 foizni tashkil etmoqda. Ushbu raqamlar filialning akademik va ilmiy salohiyatini aks ettiradi. Ushbu poydevorni yanada mustahkamlash maqsadida 15 nafar yosh professor-o‘qituvchilar ilmiy izlanish faoliyati bilan shug‘ullanib oliy ta’limdan keyingi ta’lim jalb etilgan. Filialning nashriyot tashabbuslari ham rivojlandi. Filial tomonidan to‘rtta ilmiy jurnallar ta’sis etilgan, bular “Oriental Art and Culture” ilmiy-metodik jurnali, “World of Philology” ilmiy jurnali, “Pedagogikadagi ilmiy tadqiqotlar” ilmiy jurnali va “Musiqa san’atida ilmiy tadqiqotlar” ilmiy jurnali. Ushbu jurnallar O‘zbekiston va xorij olimlari uchun yangi tadqiqotlar bilan bo‘lishish uchun platforma bo‘lib xizmat qiladi. Barcha jurnallar Google Scholar tizimida indekslanadi. Ta’kidlash joiz, “Oriental Art and Culture” ilmiy-metodik jurnali 4,311, “World of Philology” ilmiy jurnali 3,5 impakt faktorga ega. Ikki jurnal Oliy attestatsiya komissiyasi tomonidan falsafa doktori va fan doktori ilmiy darajasiga talabgorlarning dissertatsiya ishlari yuzasidan dissertatsiyalari asosiy ilmiy natijalarini chop etish uchun tavsiya etilgan ilmiy nashrlar ro‘yxatiga kiritilgan. 2024-yilda filialda ilmiy-tadqiqot infratuzilmasida sezilarli yutuqlarga erishildi. Innovatsion rivojlanish jamg‘armasi tomonidan qo‘llab-quvvatlangan ilmiy-ijodiy laboratoriyalar tashkil etildi va tijoratlashtirish jamg‘armasi mablag‘lari hisobidan jihozlandi. “Teatr san’ati” kafedrasida “Qo‘g‘irchoq yasash” ilmiy-ijodiy laboratoriya, “Cholg‘u ijrochiligi va musiqiy-nazariy fanlar” kafedrasida “Musiqiy asarlarni notalashtirish” ilmiy-ijodiy laboratoriya, “Ijtimoiy fanlar, kutubxonashunoslik va sport” kafedrasida “Kutubxona faoliyatini avtomatlashtirish” ilmiy laboratoriya, “Sahna nutqi va san’atshunoslik” kafedrasida “Sahna liboslarini yaratish” ilmiy-ijodiy laboratoriya shular jumlasidandir. Filialning ilmiy markazlari turli xil madaniy va ilmiy-ijodiy sohalarni tadqiq qilishda yetakchi hisoblanadi. “Teatr san’ati” kafedrasi huzurida “Qo‘g‘irchoq teatr san’atini tadqiq etish” ilmiy-tadqiqot markazi, “Cholg‘u ijrochiligi va musiqiy-nazariy fanlar” kafedrasi huzurida “Farg‘ona-Toshkent chol’gu ijrochiligi maktablarini tadqiq etish” ilmiy-tadqiqot markazi, “Ijtimoiy fanlar, kutubxonashunoslik va sport” kafedrasi huzurida “Kutubxonachilikning ilg‘or tajribalarini tadqiq etish” ilmiy-tadqiqot markazi, “Sahna nutqi va san’atshunoslik” kafedrasi huzurida “Farg‘ona raqs maktabini tadqiq etish” ilmiy-tadqiqot markazi, “Xalq ijodiyoti” kafedrasi huzurida “Farg‘ona vodiysi folklor san’atini tadqiq etish” ilmiy-tadqiqot markazi faoliyat yuritib kelmoqda. Bundan tashqari, “Teatr san’ati” kafedrasi professori Karim Yuldashev rahbarligida “Rejissorlik” ilmiy-ijodiy maktabi, “Teatr san’ati” kafedrasi professori Shamsiddin Usmonov rahbarligida “Sahna harakati va jangi” ilmiy-ijodiy maktabi, “Xalq ijodiyoti” kafedrasi dotsenti Ahmadjon Abdurahimov rahbarligida “Farg‘ona-Toshkent maqom yo‘llari” ilmiy-ijodiy maktabi, “Chol’gu ijrochiligi va musiqiy-nazariy fanlar” kafedrasi v.b. professori Mirmuxsin G‘apurov rahbarligida “Ko‘p ovozli musiqa ijrochiligi” ilmiy-ijodiy maktabi, “Xalq ijodiyoti” kafedrasi dotsenti Muxsim Muminov rahbarligida “Milliy qo‘shiqchilik” ilmiy-ijodiy maktabi faoliyati tashkil etilgan. Filial Rossiya, Turkiya, Qozog‘iston, Qirg‘iziston, Indoneziya, Ozarbayjon, Belarus, Ispaniya, Italiya kabi 13 davlatdagi 65 ta oliy ta’lim muassasalari bilan hamkorlik aloqalarini yo‘lga qo‘yib, jahon miqyosida o‘zini aks etishda sezilarli yutuqlarga erishdi. Ushbu hamkorliklar akademik almashinuv dasturlari, stajirovkalar va qo‘shma ilmiy loyihalarni amalga oshirishga yordam berdi.Filialning o‘quv jarayoniga Tojikistonning Xo‘jand davlat universiteti, Turkiyaning Otaturk universiteti, Qozog‘istonning Abay nomidagi Milliy pedagogika universiteti kabi muassasalarning professor-o‘qituvchilari hissa qo‘shdi. Ayni paytda filial o‘qituvchilari xorijdagi nufuzli muassasalarda qisqa muddatli stajirovka o‘tab, xalqaro tajribaga ega bo‘ldi.
Filial talabalarining 2024-yilda erishgan yutuqlari uning iste’dodlarni tarbiyalashga intilishidan dalolat beradi. Talabalarimiz O‘zbekiston Prezidenti davlat stipendiyasi, Islom Karimov nomli davlat stipendiyasi, Navoiy nomli davlat stipendiyasi sovrindori bo‘ldi. Ushbu natijalar filialning talabalari orasida ilmiy va ijodiy rivojlantirish qobiliyatidan dalolat beradi. Filial tomonidan jami 6 ta xalqaro ko‘rik-tanlovlar tashkil etilgan, jumladan “Milliy folklor san’ati” nomli xalqaro folklor ijrochiligi ko‘rik tanlovi, “Milliy ohanglar” nomli xalqaro an’anaviy xonandalik ko‘rik tanlovi, “Raqslar guldastasi” nomli xalqaro milliy raqs ijrochiligi ko‘rik tanlovi, “Navro‘z taronalari” nomli xalqaro milliy chol’gu ijrochiligi ko‘rik tanlovi, “Harakatlar sehri” nomli xalqaro sahna plastikasi ko‘rik tanlovi va “So‘z san’ati” nomli xalqaro sahna nutqi ko‘rik tanlovlari tashkil etilib o‘tkazilib kelinmoqda. Bu tadbirlar O‘zbekiston san’ati va madaniyatini tarannum etib, xalqaro madaniy almashinuvni rivojlantirishga xizmat qiladi. Talabalarning ijodiy faoliyatini yoritib borish maqsadida filial tomonidan 2024-yilda “San’at olami” nomli ma’naviy-ma’rifiy gazeta ta’sis etilgan. Filialda startap loyihalarini qo‘llab-quvvatlash va startap ekotizimini yaratish maqsadida inkubatsiya va akseleratsiya markazi tashkil etilgan. Markaz filialning innovatsion rivojlanish jamg‘armasi mablag‘lari hisobidan to‘liq jihozlangan. Startaplar uchun dastlabki bosqichlarda faoliyatini kengaytirish, investitsiyalarni jalb etish va mahalliy iqtisodiyotga o‘z hissasini qo‘shishga yordam berish maqsadida filialda “Art Start” akseleratsiya dasturi faoliyati yo‘lga qo‘yilgan. Ushbu tashabbus filialning rivojlanayotgan startap ekotizimini qo‘llab-quvvatlash va mahalliy iqtisodiyotga hissa qo‘shish bo‘yicha keng ko‘lamli sa’y-harakatlarining bir qismidir.Filialda o‘quv adabiyotlarni chop etishga ixtisoslashgan “Art Press” nashriyoti tashkil etilgan. Nashriyot filialning innovatsion rivojlanish jamg‘armasi mablag‘lari hisobidan ixtisoslashtirilgan jihozlar bilan to‘liq ta’minlangan. Xozirgi kungacha nashriyot tomonidan jami 103 mln so‘mlik 118 ta xo‘jalik shartnomalari bajarilgan.
2024-yilda filialning “Teatr san’ati” kafedrasi tomonidan “Zamonaviy teatr san’atining dolzarb muammolari: an’ana va yangi tendensiyalar” mavzusida xalqaro ilmiy-amaliy konferensiya, “Xalq ijodiyoti” kafedrasi tomonidan “Xalq ijodiyoti sohasining rivojlanish istiqbollari” mavzusida xalqaro ilmiy-amaliy konferensiya o‘tkazilgan. Bundan tashqari har yili O‘zbekiston davlat san’at va madaniyat institutining Farg‘ona mintaqaviy filiali, Qo‘qon davlat pedagogika instituti va Farg‘ona davlat universiteti bilan birgalikda “Xalq ijodiyoti sohasining rivojlanish istiqbollari” mavzusida talabalar qo‘shma ilmiy-amaliy konferensiyasi o‘tkazilib kelinmoqda. 2025-yilga qadam qo‘yayotgan bo‘lsak, san’at, madaniyat va ta’lim sohalarini rivojlantirish yo‘lida o‘z oldimizga ulkan maqsadlarni qo‘yamiz. O‘quv dasturlarini kengaytirish, ko‘proq xalqaro tadbirlarni o‘tkazish va xorijiy oliy ta’lim muassasalari bilan hamkorlikni mustahkamlash rejalari amalga oshirilmoqda. Filial isteʼdodlarni tarbiyalash, innovatsiyalarni qoʻllab-quvvatlash va Oʻzbekistonning boy madaniy merosini asrab-avaylashga intiladi. Azizlar, yana bir bor barschangizni kirib kelayotgan yangi yil bayrami bilan chin qalbimdan tabriklayman. Yangi 2025-yil hammamiz uchun omadli va barokotli yil bo‘lsin.GAPUROV MIRMUXSIN KAMOLDINOVICH
Oʼzbekiston davlat sanʼat va madaniyat institutining Farg‘ona mintaqaviy filiali direktori